قصة انتصار

كل انسان فيه سؤال يضايقه , ما يحب ان احد يساله اياه. ما اتوقع انه فيه مطلقة تحب احد يسالها عن سبب طلاقها او ام ثكلى تتقبل ان احد يسالها اشلون مات ضناها , او حتى مريض ما يثور اذا احد اساله عن مدى تشافيه من مرضه حتى واهوة عارف ان اللي قاعد يساله حريص عليه ما يتشفى فيه .

انا اكثر سؤال يضايقني , و لو انه ما يتقارن بالامثلة التي افتتحت فيها موضوعي, اهوة ليش ما ينامون عيالج ؟
بعض الناس و خصوصا بمجتمعنا يحبون يسوون نفسهم فاهمين, و يعطون حلول و يقترحون و يفرضون عليك تجاربهم حتى لو كانت تجاربهم مختلفة تماما, فقط لمجرد التفلسف و ادعاء المعرفة .

معاناتي بدت مع ولدي, الاخ الكريم كان يفرض علينا كل يوم نفتر فيه بالسيارة عشان ينام , و اذا ما سويناله هالشي يعاقبنا بالحنة و الرنة طووول الليل , قلنا ميخالف. و قبل لا يكمل سنة و نص شرفت بلسم حياني و نور عيوني ( قصدي الشوكة اللي لازالت واقفة بلعومي ) و قلبت حياتنا قلبة محترمة . الاخت الحبيبة جنها كانت موقتة الساعة تبجي من الساعة 12 بليل ليييييين الساعة 2 بجية وحدة عقبها تنام قتييلة , طبعا الزوج طفش خلال هالساعتين كان يختفي بصراحة مادري وين يروح ( والله لو كان متزوج مسيار ما دريت عنه), و المسكين ولدي انحرم من طلعته اللي تعود عليها و قام ينام بروحه و اهوة يطالع التلفزيون وانا انام حدي متنرفزة و لو كنت اقيس ضغطي اتوقع كان مليون حتى اني احيانا كنت اهزها حيييل و اقطها على السرير حيانا امن كثر ما اتنرفز . و عقبها اقوم الصبح و اروح حق مسؤولة الله لا يسامحها ما ترحم تقعد تتفلسف و تقولي ليش متاخرة و القهر والمشكلة ان اهية متاخرة بعد ( اخيه هالسالفة من 3 سنين بس ليلحين قاهرتني )عالعموم اهية ما كانت متزوجة وقتها بس الحين عندها ولد وودي اشوف شمسوي فيها :)

بعد فترة انا رحت ادارة يديدة , بس مسؤولي هذا ملتزم فبصراحة ليمن يكلمني عن تاخيري يمون لانه على الاقل يداااااااوم مثل الاوادم . الزبدة الاخوان المحترمين كانت علاقتهم مع النوم علاقة عداوة كبيرة , حرب شرسة و كره شديد. حطينا حلول, دششناهم حضانة , حرمناهم من نومة الظهر , قمت ايي من الدوام و اودي الالعاب عشان يتعبون و يردون البيت ينامون, قمت اخضع و انفذ كل النصايح اللي توصلني و تنجح مع غيري , قمت اواصل من ست الصبح لي 2 بليل, العيون صارت مثل الباندا , على قولة وحدة معاي بالدوام بشور جنج مدمنة ..... لكن ما نجح معانا شي ؟؟؟ شككوني الناس , اللي قام يقول حرمي من الكاكاو و اللي يقول حرمي من البيبسي , اشوى محد قالي حرميهم من الهوا اللي يتنفسونه بعد. ووحدة اقترحت علي اشربهم دوا كحة كل يوم عشان ينامون و تقول ا اختها تسوي جذي عادي ما فيها شي .... مادري اشلون في ام يرتاح قلبها و اهية مشربة عيالها دوا ممكن يضرهم على المدى البعيد بس عشان حضرتها ...... تنام .

تازمت المشكلة الولد قام ينام و البنت معاندة , من احد هذي التصريحات الكبيرة اللي تختص بالنوم , واللي الناس قاموا يحذفونها علي تحذف كان فيه تصريح بان عدم النوم ممكن يكون بسبب خلل بالمخ ! و لاني كنت يائسة و بائسة و اتعلق باي بصيص امل و خايفة اتحسف اذا ما اتخذت خطوة ايجابية , رحت لدكتورة اطفال و فحصت بنتي , والحمدلله ما طلع فيها شي . الى جانب تصريح ينررررفز بان اكلي للكاكاو وانا حامل اهوة السبب بهل شي , يعني الحين صرت الحامل الوحيدة بالدنيا اللي اكل كاكاو ؟؟؟؟كا سعاد عبدالله كلت صابون بدرس خصوصي :)

العجيب بالموضوع , ان بالنهاية انتصرت ......الحين نومتهم تحسنت واااايد و من روحها بدون اي محاولات جنونية او عمليات انتحارية من اللي كنت اسويها عشان ما ينامون الظهر او المغرب , قبل اذا بغوا ينامون نتازم و نستنفر ونصير ارجوزات انا و خدامتي , نطامر و انتكوكس و نلعب و نشغل اغاني , نخاف نسكر الليتات و الظلمة تدوخهم , نخاف حتى نزور ايام الاسبوع و ننحكر بالبيت عشان السيارة لا تدوخهم, قمنا نخاف انييب طاري النووووووم . و الحين النومة طبيعية , بصراحة مادري شنو السبب, ما تغير باكلهم شي , ولا باسلوب حياتنا , بس صدقت يدتي الله يعافيها و يشافيها لانها كانت دايما تقول ( يكبرون و يتعدلون ) و سبحان رب العالمين اللي ما رد دعائي و كبل جهودي بالنجاح.

ملاحظة : مقالتي هذي اهداء حق كل ام متنكلة من عيالها, و قاعدة تمر حاليا باللي مريت فيه , يمكن تكون النتيجة فيها عزاء لها. و بالاخص زوجة حماي اللي بنتها ( بنت عم عيالي ) تمر بنفس اللي مروا فيه عيالي و اكثر شوي حتى اني قمت اعاير خالتي واقولها, المشكلة شكلها بجيناتكم لوووووول.
ملاحظة ثانية اليمة : كنت مرشحة لرئاسة قسم و انحرمت من هالشي لان دوامي متخربط نتيجة نومة عيالي.