جنطتي الجينفشي

للوهلة الاولى , ممكن يقول الواحد , شكو كاتبة عن جنطتها ؟ خلصت المواضيع ؟ مو شي يديد اكيد عندها مليون جنطة ماركة تشتريها اول كل شهر مع كل راتب ينزل , والكبت بينفجر من هالجناط .
بس هذا كله ما يمت للحقيقة بصلة , الحقيقة ان الجنطة هذي كانت بمثابة جائزة الاوسكار لجهودي و معاناتي كام وزوجة , و عطتني دفعة معنوية كبيرة لدرجة ان ( التحلطم ) اللي لازمني مدة طويلة اختفى تقريبا , و صرت اقدر زوجي و عيالي اكثر .
الموضوع باختصار ان خلال 6 سنوات زواج ما تعودت من زوجي يتذكرني بهدية في اي مناسبة, لا عيد ميلادي ولا عيد زواجنا , كنت دايما سباقة بالهدايا و ترتيب الاجواء الرومنسية و المفاجات , و بالمقابل ما كنت القى منه الا كل برود ولا كاني تعبت و اختبيت بس عشان اسعده و ارضيه .
مع الايام بردت ما قمت اسوي اي شي , و اخر عيد زواج لنا مر مرور الكرام ..... ممم لا استغفر الله قبله بيوم رحنا مطعم و قالي كا امس موديج مطعم اشلون تقولين نسيت عيد زواجنا :)
و بعدين قرر زوجي المحترم يساااافر , طبعا ما قلت شي بس اتبعت نصيحة انصحتني اياها ام رامي ( موظفة مصرية كانت معاي بالدوام ) قالتلي الرجالة ما ينفعش تستني منهم حاجة , لازم تطلبي اللي انتي عاوزاه . و فعلا قتله انا بخليك تسافر بس ماكو شي ببلاش و سكتت. و ليمن يه من السفر فاجاني بالجنطة ( وااااااو ) جفنشي ؟ طبعا اول سؤال سالته اياه و بدون تفكير : اصلية ؟؟؟؟؟؟ المسكين قال ايه ..... فحسيت بالدنيا فجاة صارت وردية و حلوة و هوا بارد قام يكتكت مادري من وين واتوقع ويهي قام يقط الوان و عيوني مو راضية ترمش و احس اسمع موسيقى قامت تشتغل بمخي ( اشدعوا عيل لو شاريلي بيت شبسوي)..... جنطة جيفنشي مرة وحدة ؟ على قولة المثل يا طخه يا اكسر مخه ( يا ولا شي يا جنطة من زمان ودي فيها و مو قادرة اشتريها ) اللي ونسني اكثر ان اهوة عارف ان بخاطري جنطة , فشرالي اللي خاطري فيه ,,,, ثانك يو بو عبووود