( لجين ) و ( الكادي)

طبعا اكيد كل اللي يدشون البلوج مالي للوهلة الاولى بيقول، اشمعنة مسميته لجين الكادي , من وين مطلعة هالتركيبة الغريبة ..... للعلم لجين و الكادي هذيلي بناتي و حسيت مافي اغلى من بناتي اسمي البلوج باسمهم
طبعا انا عانيت الامرين بسبة اسامي بناتي , في ناس بيقولون اكيد انتي الله يهداج مادري من وين مطلعة الاسامي, على قولة خالي ليمن وضحتله ان كادي في باسمها الف و لام , قال ليش ما تسمين مثلنا يعني لووووول ... مابي , ابي اميز بناتي , انا اسمي حلو فكنت اتمنى اسمي بناتي اسامي يفتخرون فيهم مو مثل حفيدة عمتي من كثر ما اهية مفتشلة من اسمها ما ترد الا اذا نادوها فلة , و هالعقدة ملازمتها من كان عمرها سنتين ... مو حرام
اول ما حملت بلجونة و عرفت انها بنت ما تعبت و انا ادور لان كان حلمي من زمان اتييني بنت و اسميها لجين يعني كان الاسم جاهز و ريلي وافق ما قصر و مرت على خير . مع ان يدتي الله يرحمها ما سمعتها تقوله ولا مرة ما كانت تعرف تقوله و اغلب الناس يسمونها رتوجة مادري ليش ....
بس المشكلة العودة ليمن حملت بكادي و عرفت ان فيني بنت... توهقت لاني لازم القى اسم مميز حق بنتي الثانية بقدر التميز اللي حصلت عليه بنتي الاولى .... فتذكرت مرة كنت بالجمعية و سمعت وحدة تقول حق اتوقع حفيدتها ( اشتري حلاو حق كادي بعد لا تنسين ) هني واااايد جذبني الاسم و قلت الله وايد عجيب و موسيقي و مميز و تذكرت اغنية عبدالمجيد ( جوري و نرجس و كادي .... فيك الجمال العجيب ... رهيب والله رهيب) فقلت هذا اهو الاسم المناسب ... طبعا وقتها كنت خايفة من بداية حملة التطنز على اصولها هالمرة لان الاسم اغرب هالمرة , على الاقل لجين موجود بالمجلات و ليالينا مليون لجين تترزز....بداية قلته حق امي و اخواني كلمن تطنز من جهة , حتى ما اعرفوا يقولونه الا ليمن كررته ( اشدعوا ) و ريلي ليمن قتله عجبه بس راح و قال حق خالتي نقينا اسم عجيب جنه يبدي بحرف الجيم ... ذكريني شنو اهوة !!!!!! البنات بالدوام بعد عمري اهمة اللي كانوا سامعين فيه و حتى نصحوني اظيف الالف واللام اكشخ .... اهني بدت حملة التطنز على حقيقتها .... اللي يقولي انتي من وين مطلعة هالاسامي... و خالتي تقول جنه بتسمون على ام كايد الفلسطينية اللي بفيلكا ! و حمد ولد عمي يقول عني : لا هذي مسختها مو مال تييب بنات !!!!! و بنت خالت امي الله يهداها تقولي مسمين بنتكم راكان ؟ اشهالاسامي الوكيحة !!!! اشدعوا عليكم , مسوية جريمة انا يمكن.
يدتي زوغتها ليلحين تتخربط فيه بس هالايام طلعتلها طلعة تسميها ( كدونة ) حركات ام عبدالله the first
و طبعا عكس حملة الانتقادات هذي لقيتها عند صديقاتي حياتي , اللي ايدوني حتى وحدة قالتلي صج انج مميزة باختيار الاسامي , الله يخليهم لج .... شوفوا الناس الذوق ...

ملاحظة : ابلة ولدي باكستانية كانت يديدة السنة اللي فاتت, و كنت مودية ولدي الدوام و كانت لجونة مجرد مرافق ,,, شفت بنت اسمها لجين حسين بصف ولدي و قلت حق الابلة : يحليلها لجين , بنتي بعد اسمها لجين ان شاءالله بالمستقبل تصير طالبة عندج . جان تسالني الابلة , مدام بسالج سؤال , قتلها تفضلي . قالتلي اسم لجين انتوا وايد تسمونه ؟ قتلها لا, حده لا اسم نادر وايد ... قالت لي اشرايج ان انا عندي 3 لجين بثانية روضة !!!! و يقولون لي مادري من وين مطلعة الاسامي ..
ملاحظة ثانية : ابوي الله يحفظه شمات بطبعه و استلمني على اسم لجين .... فليمن قررت اسمي كادي و انا بشهري السادس رحتله و قتله ترى انا بسميها كادي , اتطنز من الحين لين اولد اشبع تطنز بس بعدين تعود على الاسم بليز .... و فعلا هذا اللي صار , من انولدت ما عيب و لا تطنز على الاسم و تعود اشلون يقوله ..لغز مو اسامي
ملاحظة اخيرة: امس حلمت اني يايبة بنت ثالثة و طول الحلم كان مشغووووووول بالي امبيييه بنت ثالثة ! يا حسررتي شسميها , ما حاتيت تربيتها ولا اي شي ثاني .... طول الحلم كنت احاتي شسميها لوووووول