ولدي باولى ابتدائي

طبعا انا راح احاول اخلي الموضوع اهون مما هو عليه بالواقع بقدر الامكان, لان الواقع مو صج و اصعب من ان يكتب على ورق ( اهم شي )
طبعا قبل لا يدخل ولدي وولد بنت خالتي فواز وبنت خالتي منى اولى ابتدائي باسبوع , كان عندنا فرحة كبيرة ان عيالنا سلم قلبهم كبروا وبيروحون اولى ابتدائي, واحنا شوية و نبجي و خالتي بتكت نون على حفيدها عشان بيدخل الابتدائي وانا و بنت خالتي رحنا نشتري البنطلون الرمادي و خلينا فواز و عبود يسوون عرض ازياء في بيت يدتي و يببنا وحالتنا حالة ( مادري اشبنسوي لو ناجحين ولا قابلينهم بالجامعة) بس الواقع المرير بدا ليمن ادخلوا المدرسة !!! صادف ان الثلاثة كلهم كانوا داشين روضة خاصة وكان نصيبهم بالدنيا و نظرا لظروف مختلفة ان كلهم يروحون الابتدائي بمدارس حكومية .... طبعا الواقع كان صعب خصوصا بالنسبة لولدي و فواز لان روضتهم ما كانت مدرسة بمعنى المدرسة, لانها كانت في بيت كبير فيه من الحضانة لين الروضة ... و فجاة صاروا بمدارس كبيرة و فيها مقصف و يهال كبار و ابلات مو متواجدين معاهم طول الوقت وحدة تطلع ووحدة تدخل .... منى مسكينة كانت تعاني كل ما صارت الفرصة انها تبي احد تمسكه لانها خافت من الواقع .. و فواز مسكين كان يبي احد يرافجه بالفرصة و يقعد معاه بس حتى اليهال مسوين احزاب اللي يقوله انت مو ولد عمنا و اللي يقوله انت يديد و احنا ربع من زمان ( اشعرفكم !!!!) حتى مسكين كان يكره الفرصة.


المنهج :
منهج العربي العظيم و اللي تطور عبر السنين من (مع حمد قلم) الى ( انا اكل و اشرب ) الى ( انا عبير و انا سالم ) السنة اللي فاتت اخترعوا الذرة ليمن ابلشونا بمنهج ( امل فراشة بيضاء و اسراء فراشة ملونة) طبعا فواز مو عاجبه يقول اشعلينا احنا ندرس عن الفراشات ليش ما يدرسوننا عن السيارات ( بذمتكم مو صاج الولد)


النقلة من الخاص للحكومة :
طبعا انا و بنت خالتي تعودنا على ان الادارة تحت امرنا يردون علينا متى ما نبي, نستفسر و نحن فوق روسهم كثر ما نبي , و هم يردون علينا و موبايلات الابلات عندنا .... طبعا الحين محد يلقينا ويه, ولا فيه احد يعطينا موبايله والاستاذانات كثرت , واتعنى و نروح لهم وهم بالقصب يردون علينا , يا ربي مادري ليش يبهدلونا صج حط فلوسك بالشمس و اقعد بالظلال, انا وبنت خالتي نفسيتنا تعبت مع ان عبود و فواز اول عيالنا اللي دخلوا المدرسة .... و لولا ان احنا صغار بالسن جان ضغطنا مشلل و السكر مرتفع من امه ....


اللامبالاة :
اهم ما في الموضوع, ان الامر صار جد الحين و حضرة فواز بيه و عبدالله باشا ليلحين يبون يلعبون و يطالعون تلفزيون و يسهرون و يروحون الالعاب بنص الاسبوع و يسوون الواجب بعدين... و طبعا بلاعيمي طاحت و انا اشرح ان امل بيضاء و اسراء ملونة و اهوة عقب نص ساعة تفكير يقولي .... شنو قلتي ماما ؟ بقول مثال واحد عن اللامبالاة اللي ولدي يعاني منها ..... في يوم رحت مدرسته اسال ابلة العربي عنه جان تقولي ام عبدالله وينج امس ؟ طبعا جنها كاته علي ماي بارد ثلج و ساطرتني سطار محترم و رديت و قلت و انا عيوني طالعة من مكانها ( ليش شنو كان في امس ؟ ) قالت : (امس مكرمين اولى سادس كاحسن صف و احسن معلمات على مستوى المدرسة و كل اولياء الامور كانوا حاضرين ) !!!! امبيييييييييييييييييييييييه . قتلها ( ابلة تكفين غيري بدلي , قوليلي اللي قاعدة تقولينه مو صج ! ليش ما قلتولي) ؟ قالت ( المفروض الورقة وصلتج او على الاقل الولد قالج او حتى دزولج الاخصائيات مسج ).... طبعا المسج ما وصلتني لان عبود صارله اسبوع اوصيه عط الورقة اللي فيها رقمي حق الابلة و اييني البيت يقولي وييه نسييت .... و الورقة مادري وين قاطها و الكااااااااارثة العظمي .... ان ما فكر حتى ايي يسالني ماما وينج ليش ما ييتي اليوم ..... معقولة هاللامبالاة معقولة ما قال ليش كل الامهات موجودين الا امي ؟؟؟؟؟؟؟؟؟؟؟ الله يكون بعوني .. شكلي بشتريلي جهاز ضغط لان من داوم ولدي بالابتدائي وانا مصدعة ( يا ترى ليش !!!!)


ملاحظة : مسئولتي ذاك اليوم تضحك علي تقولي انتي من دخل ولدج اولى ابتدائي و انتي مادري اشفييج , صاااااااااااااااجة .